Act 14 | WSK | STEP | Iconium ningi kilek koma suwanta tala aratam. Paul Barnabas ilak Juda nunga synagogue ningi kasu naguman ale den yawarakala apukasan. Se Juda kariimet, se Greek kariimet suen biya Jesus ko nongomang ningi nunguning aram.

Acts 14

Paul Barnabas ilak Iconium ningi ura bitakasan

1 Iconium ningi kilek koma suwanta tala aratam. Paul Barnabas ilak Juda nunga synagogue ningi kasu naguman ale den yawarakala apukasan. Se Juda kariimet, se Greek kariimet suen biya Jesus ko nongomang ningi nunguning aram. 2 Bare Juda sang nongomang ningi me nunguning aram, mu nuna ali sor saki ko kariimet sang nongomang atumukasan se nuna Kris alo nunga ko nongomang magakaso.

3 Se Paul Barnabas ilak tom maiya nuam Iconium baga se Kari Biya ko dugu duap sokel ago baluwakasan. Kari Biya sail nungaram, se kilek sokel ago suen biya bitakasan. Se mu te Kari Biya kariimet iwita nunga kausam, noko gomang nungaram mu ko den nuna ilagala apukasan mu nunguningta. ^{▼▼Acts 14:3 Kari Biya nunga saongam: Mark 16:20; Acts 19:11; Heb 2:4.}

4 Se sor mu ko kariimet pagaman motam ilagala: sang Juda nunga sangarukasan, sang apostle ilagala mu nunga sangarukasan. 5 Udagi sor saki ko kariimet, se Juda kariimet saki nunga supuling ago buta bolala awuman, ale Paul Barnabas ilak nunga bita maguwumon ale manga te nunga usagomon se kuemonko den nungurman. 6 Bare nuna ilagala den mu ko ikiman, ale naguman nama Lycaonia sor te, wonong ilagala Lystra, Derbe, se wonong gotektek wonong mu ko pingita namaman. 7 Ale mu te agotala Kaem ko den gilalong yawara nunga manarukasan.

Paul Barnabas ilak Lystra sor te ura beteman

8 Se Lystra wonong te kari bo dagiwakaso mu suwik tilital bilangaram, ale katir aolak me ilu arigam. 9 Se Paul den apuwakaso mu nu ago daigam ikiwakaso. Se Paul nu arigam, bare kari mu nungerukko wore ko la gomang ningi nunguning aram se bagakaso mu arigam, 10 ale biyala balam, “Bares ale siwik te sanamirko!” mam. Se kari mu tingam barasam ale aolak ilukaso.

11 Se kariimet motam biya bagaman mu Paul munan beteram mu aringiman, ale Lycaonia den te aiman ale balukasan, “Kaem kari ko geragaman ale ananangate tai kapaman!” makasan. 12 Ale Barnabas balukasan mu Zeus makasan, ale Paul balukasan mu Hermes makasan, mu awuk, nu munakawakaso se. ^{▼▼Acts 14:12 Zeus mu Greek kariimet nunga kaem gira wore ko nup, se ko nup bo Jupiter. Se Hermes mu nu kaem kawel bo tala, bare nu kaem kawel saki nunga den bala ko kari, se ko nup bo Mercury.}

13 Zeus ko temple wonong imi ko watingi anikaso. Se temple mu ko priest bulmakau kari mu nunga giam, ale tam sisik mayang te tugu gilingiman mu ago giam, ale wonong ko songkuring te tai sanamaram. Nu kariimet arungu Paul Barnabas ilak tama bita nungarmonko.

14 Bare Paul Barnabas ilak mel mu ko den ikiman ale nunga guang barurumuman, ale naguman kariimet biya mu ningi sanamaman, ale biyala aiman balman, 15 “Kari, nina anape ko munan sowore bitawasan? Ana nenenga turantala, aliti kari. Bare den gilalong yawara ago taiman, nina te ikial ale munan nunguning mena nina te bagasan sowore nibiring tual, ale Kaem marak ago, taiti, ali, gagi, se mel suen biya ningi awete awuram se anisan mu kote namaralko. 16 Ulengkala ko tom te Kaem kariimet suen biya yam nungarkiwakaso, se nongota nunga ikia te geragakasan. 17 Bare nu yumurok nunguning se kariimet nu me ko ikimonko iwita me bitakaso. Nu munan ningo nina ningarukaso. Nu tuwik ningarukaso, na inang ko tom tom te ningarukaso. Na terong ma la ningarukaso, se nengemang ninguru amilmilakaso.”

18 Nuna ilagala uwuta balman, bare kariimet tama bita nungarmonko am sail tagikasan. Se nuna ago kaeya laga asele ikia mu menawuman.

19 Bare Juda saki Antioch se Iconium wonong mu ko taiman ale kariimet apostle alo nogowom me karomonko nongomang kulukurukasan. Ale nuna Paul manga te usagaman, ale gurataman ilak wonong buring ko arataman ale sapa gilingiman. Ale ikiman mu Paul kueram ko balukasan. ^{▼▼Acts 14:19 Nuna Paul manga te usagaman: 2 Cor 11:25.} 20 Bare Kris alo taiman taluru guruguman se nu barasam, ale aking wonong mu ningi kasu naguram. Ukiram se aking nu Barnabas ilak wonong Derbe mu te namaman.

21 Paul Barnabas ilak sor mu te den gilalong yawara apukasan se kariimet suen biya Jesus ko olekem ko aratu gilingiman. Asele nuna peleman Lystra se Iconium se Pisidia sor te Antioch namaman. 22 Ale Kris alo nongomang sokel tui tui namakasan. Ale nunga manarukasan, “Nina nengemang ningi nunguning ilukuawuralko,” ma balukasan. “Ana Kaem ko kingdom ningi kasu nagunakko, mu ikup suen biya aringinak asele kasu nagunakko,” makasan. 23 Ale nuna Kris motam suen biya umu ningi nunga supuling balu nungaru nungaru ago namaman. Ale ngatangomonko se na namonko nuguring kaloman ale na me nokasan. Ale ngatangawa kariimet Kari Biya ko nongomang ningi nunguning aram mu nu nunga bituokko kuting te nunga awuman.

Paul Barnabas ilak peleman Syria sor te Antioch namaman

24 Asele nuna sor mu beteman ale nama Pisidia ningi aolak iluman nama Pamphylia ningi arataman. 25 Nuna wonong Perga mu ningi den gilalong yawara balman. Asele nama Attalia arataman. 26 Mu te dal taman ale peleman nama Antioch arataman, sor te Kris alo nuna ilagala nunga ura te Kari Biya nunga sangukko ngatangaman, se nuna ura mu bita kutuwuman ale peleman taiman. ^{▼▼Acts 14:26 Antioch sor te: Acts 13:1-2.} 27 Tai arataman mu nuna Kris alo nunga biguwuman ale Kaem nononga ura ningi munan suen biya bitakaso mu nunga manaru sapaman. Ale balman, “Kaem sor saki ko kariimet nunga lage kuring kaogam se noko nongomang ningi nunguning aram.” Ale nuna tom maiya nuam Kris alo arungu mu te bagakasan.

28